Óregla í bíóhúsum

Tengt Siglufirði

ÓLÆTIN VIÐ NÝJA BÍÓ og Óregla í bíóhúsum

Óregla í bíóhúsum

Siglfirðingur 13. janúar 1945

Á hverju kvöldi kl. 7.45, oftast nær stundvíslega, mætir við Nýja Bíó hópur af stálpuðum drengjum, þeir eru talsvert hávaðasamir, með ankannaleg hljóð, bölv, ragn, grát, hranalegan hlátur, áflog og ryskingar. Berst leikurinn og áflogin yfir þvera götuna og er gatan svo upptekin stundum af þessum óaldarlýð, að umferð stöðvast.

Þegar bíóhúsið er opnað, ryðst þessi hópur inn í anddyrið með ólátum og gargi, þjótandi upp og ofan stigann, og inn í hvert það skúmaskot, sem með góðu móti er hægt í að troðast. Stundum raða þeir sér svo þétt við, þar sem aðgöngumiðar eru seldir, að illmögulegt er fyrir fólk að komast að. Fyrir hefir komið, að bíógestir, sem koma til þess að tryggja sér aðgöngumiða áður en sýning byrjar, komist að því fullkeyptu að komast út aftur.

Bjarni Jóhannsson -Ljósmynd: Kristfinnur

Þessi drengjahópur er með ýmiskonar hrekki við dyraverði og jafnvel bíógesti líka. Snjókúluregn er stundum inn í anddyrið, og stundum reynt að koma snjókúlum upp á loft, stundum hefir verið gerð tilraun með að koma fyrir smásprengjum uppi á loftinu. Vegna þessa ódæma uppivöðsluháttar, er anddyrið oftast

orðið eins og gatan úti, þegar bíógestir koma- og er ákaflega óyndislegt að koma þangað.

Það er ákaflega leiðinlegt fyrir Siglfirska borgara að þurfa, í hvert sinn og þeir fara í bíó, að brjóta sér braut með hrindingum og olnbogaskotum inn í þetta hús, en leiðinlegra er þó að kynna aðkomufólki það ódæma aga- og stjórnleysi, sem ríkir hér.

En mér er spurn. Er ekki hægt að losa borgara bæjarins við þennan bíó-ófögnuð?

Hver á að sjá um það? Er ætlast til að hinir og þessir borgarar taki sig til, af sjálfdáðum, og banni drengjum þennan ósóma? Eða hvað?

----------------------------------------------------------

Einherji 25 janúar 1945

Óreglan við Nýja-Bíó

Eftir að annað bíóhús hóf hér starfrækslu sína vonuðu margir, að Nýja Bíó, sem fyrir var, myndi nú fara að bæta úr þeim ágöllum, er sýningargestir og aðrir töldu vera á rekstri hússins. Það var almenn óánægja útaf myndavali og ýmsu öðru í sambandi við þetta skemmtihús, td. vöntun á hreinlæti og reglusemi. En þetta urðu bíógestir að þola, því að þeir höfðu ekki í annað hús að venda, ef þeir ætluðu sér að sjá kvikmynd.

Við starfrækslu Siglufjarðarbíó hafa orðið mikil umskipti á myndavali. Nýja-Bíó hefir bætt myndaval sitt að miklum mun og er það að sjálfsögðu mest að þakka því, að nú hefur það fengið keppinaut.

En þótt myndavalið hafi batnað hjá Nýja-Bíó frá því, sem áður var, þá hefur það ekki losað sig við sinn gamla, hvimleiða fylgifisk, en hann er skeytingarleysið hjá eiganda hússins um að þetta arðbæra fyrirtæki hans fylgi þeim reglum, sem settar eru í sambandi við reksturinn, en í kjölfar þessarar trassamennsku dafnar svo hin mesta óregla og ómenning, sem er eiganda hússins til minnkunar og samborgurum hans til óþæginda og leiðinda.

Þeir, sem hafa heimsótt bæði bíóhúsin hér hafa fljótt orðið varir við þann mismun, sem þar er á, allri reglusemi. Í Siglufjarðarbíó fær gesturinn að njóta myndarinnar í friði og ró, sem hann á líka heimtingu á. Þar er anddyrum hússins lokað eftir að sýning hefst og engum, hvorki unglingum eða örum, leyft að hafast þar við á meðan á sýningu stendur.

En þeir, sem heimsækja Nýja-Bíó að kvöldinu hafa aðra sögu að segja. Það fyrsta, sem bíógesturinn verður þar var við, er hann kemur í anddyri hússins, að forstofan er þar að miklu leyti upptekin af stálpuðum drengjum, sem láta allófriðlega.

Troðast þeir með hrindingum og olnbogaskotum að klefa þeim, sem aðgöngumiðar að sýningunni eru seldir, þrátt fyrir það þótt þeir ekki megi hafa aðgang að kvöld sýningum, en það einkennilega skeður:

Þessir æskumenn fá afgreiðslu eins og bíó gestirnir, þeir fá afgreitt, sælgæti og gosdrykki í stað aðgöngumiða að sýningunni, þegar svo sýningin byrjar

og bíó gestirnir eiga að fara að njóta myndarinnar, þá berst þeim til eyrna ofsafenginn hávaði framan úr anddyrum hússins frá viðskiptavinum sælgætis og gosdrykkja sölunnar, en hún er höfð í fullum gangi á meðan á bíó sýningum stendur og hverjum og einum, sem þangað kemur utan að götunni er selt það, sem hann biður um, ef það er til.

Þessi sælgætissala er því að miklu leyti valdandi þess, að bíógestir geta ekki fengið að njóta myndarinnar, sem þeir eru búnir að greiða aðgang að.

Lögreglan hefur fyrir löngu síðan kært yfir þessari sælgætissölu, til annarra en bíó gesta, en úrskurður um það efni er ennþá ókomin. Ekki aðeins sýningargestir heldur og allir bæjarbúar verða að krefjast þess, að sú ómenning, sem eigandi Nýja-Bíó hefur verið að gróðursetja í sambandi við þetta fyrirtæki sitt, verði með öllu upprætt.

Eigandi hússins verður að koma í veg fyrir ólætin í bíó anddyrunum, með því að hætta að egna þangað unglinga og börn með sölu á sælgæti og gosdrykkjum. Hann verður að hafa þar dugandi dyravörð - ekki óþroskaðan ungling eða örvissa gamalmenni, heldur mann með fulla starfskrafta.

Bjarni Jóhannsson