Áki Jakobsson ráðherra

Áki Jakobsson f. 01-07-1911 - d.11-09-1975 fyrrum alþm. og ráðherra, varð bráðkvaddur hér í Reykjavík 11. sept. 1975, 64 ára að aldri.

Áki Jakobsson var fæddur í Húsavík við Skjálfanda 1. júlí 1911. 

Foreldrar hans voru

Jón Ármann kaupmaður þar, síðar bókhaldari í Reykjavík, Jakobsson kaupstjóra í Húsavík Hálfdánarsonar og kona hans, Valgerður Pétursdóttir útvegsbónda í Ánanaustum í Reykjavík Gíslasonar.

Árið 1913 fluttist Áki með foreldrum sínum vestur um haf og átti heima í Winnipeg til 9 ára aldurs, en á árinu 1920 fluttist fjölskyldan búferlum til Reykjavíkur.

Hann lauk stúdentsprófi frá Menntaskólanum í Reykjavík 1931 og lögfræðiprófi frá Háskóla Íslands 1937. Að námi loknu var hann bæjarstjóri á Siglufirði á árunum 1938–1942. Árið 1942 fluttist hann öðru sinni til Reykjavíkur og rak hér síðan lögfræðiskrifstofu til dánardægurs.

Áki Jakobsson - Ljósmynd Kristfinnur

Áki Jakobsson - Ljósmynd Kristfinnur

Héraðsdómslögmaður varð hann árið 1944 og hæstaréttarlögmaður 1957.

Hann var landsk. alþm. frá vori til hausts 1942 og síðan alþm. Siglfirðinga 1942–1953 og aftur 1956–1959, sat á 16 þingum alls.

Atvmrh. var hann frá 21. okt. 1944 til 4. febr. 1947. Árið 1942 tók hann sæti í mþn. í stjórnarskrármálinu, var kosinn árið 1943 í mþn. í sjávarútvegsmálum og skipaður sama ár í nefnd til að athuga hvernig megi veita kaupstöðum, kauptúnum og sjávarþorpum eignar- og umráðarétt yfir nauðsynlegum löndum og lóðum með sanngjörnum kjörum, og samdi n.frv. til l. um ræktunarlönd og byggingarlóðir í kaupstöðum og kauptúnum. Í Síldarútvegsnefnd átti hann sæti 1944–1946 og í stjórn byggingarsjóðs kaupstaða og kauptúna 1950–1953.

Áki Jakobsson hneigðist ungur að aldri að róttækum stjórnmálaskoðunum. Hann tók þegar á skólaárum sínum þátt í íslenskri stjórnmálabaráttu af lífi og sál.

Hann var athafnasamur bæjarstjóri í Siglufirði að loknu háskólanámi og naut kjörfylgis bæjarbúa til setu á Alþ. á annan áratug.

Flokksbræður hans völdu hann ungan að aldri til setu í ríkisstj. Hann var atvmrh. í nýsköpunarstjórninni á tímum mikilla framkvæmda í atvinnumálum á vegum ríkisins.

Eftir að ráðherradómi lauk sinnti hann lögfræðistörfum ásamt þingmennsku og fékkst þá um skeið dálítið við rekstur útgerðar og fiskvinnslu.

Áki Jakobsson var einarður og fylginn sér í baráttu fyrir stefnumálum sínum, snjall og áhrifamikill málafylgjumaður og ötull forvígismaður á því sviði stjórnmála þar sem hann hafði haslað sér völl. Á ráðherraárum hans féll í hans hlut að hafa forstöðu um miklar framkvæmdir til eflingar atvinnuvegum landsmanna og gekk hann að því starfi með miklum dugnaði og stórhug.

Ekki fór hann ætíð troðnar slóðir í stjórnmálum og stóðu oft harðar deilur um orð hans og athafnir. Hann var harðskeyttur og rökfastur í málfærslu sinni á sviði stjórnmála og í réttarsölum, víðlesinn og margfróður í ýmsum greinum. Um skeið kvað mikið að honum á vettvangi þjóðmála, en ýmis atvík og aðstæður urðu til þess að hann hvarf af Alþingi á góðum starfsaldri.

Minningargreinar: http://timarit.is/view_page_init.jsp?issId=221436&pageId=2846610&lang=is&q=%C1ki%20Jakobsson%20%C1ki%20Jakobsson